Deputetja demokrate, Rudina Hajdari, deklaroi sot nga foltorja e Kuvendit se është kërcënuar në zyrën e saj.
Ajo kërkoi nga kreu i Kuvendit, Gramoz Ruçi, të marrë masa, përpara se të ketë ndonjë viktimë.
Sipas saj, asnjë deputet nuk duhet të hyjë pa u kontrolluar mirë.
“E papranueshme që një femër të kërcënohet. Kam pasur raste që në zyrën time më kanë ardhur dhe më kanë kërcënuar. Ka ikur ajo kohë. Ju lutem, merrni masat para se të kemi ndonjë viktimë. Masat të jenë në kryesinë e kuvendit, asnjë deputet nuk duhet të hyjë pa u kontrolluar, të marrë të tjerë dhe të shantazhojë. Ju lutem të merren masat” deklaroi Rudina Hajdari.
Nga ana tjetër, Ruçi i bëri me dije, se u ka kërkuar punonjësve të shërbimit brenda godinës që të bëjnë detyrën, shkruan ‘Top Channel’.
Më tej ai tha se kërkesën e Hajdarit, ia ka dorëzuar edhe Ministrisë së Brendshme.
“Iu kam kërkuar punonjësve të shërbimit që brenda godinës të bëjnë detyrën. Kërkesën tuaj ia kam dorëzuar Ministrisë së Brendshme për shqetësimet që keni trajtuar”, tha Ruçi.
