Ditën e sotme Asambleja e Partisë Socialiste ka shkarkuar kryetarët e degëve të partisë.
Sekretari i Përgjithshëm i PS, Damian Gjiknuri u shpreh se brenda prillit do të miratohen rregullat për zgjedhjen e kryetarëve të rinj dhe procesi pritet të përfundojë brenda qershorit.
“Kemi për të miratuar vendimin që u miratua në asamblenë që ka të bëjë me ndërprerjen e mandatit 4 vjeçar të kryetrarëve aktualë të partisë.
Brenda 30 prillit do të miratohen rregullat për përzgjedhjen e kryetarëve të rinj të degëve dhe ky proces do të përfundojë brenda qershorit.
Kërkoj që meqë janë marrë masat për votimin, kërkoj që deputetët, kryetarët e partisë, anëtarët e asamblesë, drejtuesit politike të marrin masa që të gjithë të shkojnë të marrin pjesë në votim”, u shpreh Gjiknuri.
Kryeministri Edi Rama ka bërë publike emrat e tre sekretarëve të rinj, që do të jenë pjesë e Partisë Socialiste
Mësohet se Eridjan Salianji është propozuar Sekretar për çështjet ligjore dhe zgjedhore, ndërsa Blerina Gjylemeti Sekretare për Organizimin.
Laert Duraj propozohet Sekretar për Emigracionin.
Ndërkohë Blendi Klosi prezantoi ndryshimet në statut. Klosi tha se statuti parashikon ngritjen e një zyre për të komunikuar direkt me qytetarët.
“PS ka nevojë për një analizë të thellë. Kryetarët e partive të bashkive nuk mund të jenë vetëm kalkulime, janë opinioni i tyre, por duhet të jenë njerëz që të bëjnë atë që është thelbi. Kryetari i bashkisë është përfaqësues i bashkive shumë të mëdhaja dhe analiza e bërë dëshmon se kryetari i partisë duhet të përfaqësojë shumë më tepër opinionin e qytetarëve. Një paketë e rëndësishme është ajo e zgjedhjes së kryetarit”, tha Klosi.
