Prokuroria e Tiranës ka marrë si të pandehur Ervin Muçën, ish-drejtorin e IT në Policinë e Shtetit, për ndërhyrje të paautorizuar në sistemet kompjuterike.
Ai akuzohet për kopjimin e të dhënave nga sistemi TIMS, një çështje që është veçuar për hetim pas skadimit të afateve ligjore.
Përveç Muçës, prokuroria po heton edhe individë të tjerë për shpërdorim detyre.
Ervin Muça është vënë nën masë sigurie arrest në shtëpi dhe akuzohet për nxjerrje të dhënash sensitive nga sistemi TIMS, duke pretenduar se veprimet e tij kishin si qëllim krijimin e një back-up-i të sistemit.
Hetimet tregojnë se ai ka përdorur kodet e një punonjësi tjetër dhe ka qenë i shoqëruar nga një person i paautorizuar.
Po ashtu, prokuroria po shqyrton edhe akuzat për presion ndaj vartësve të tij për realizimin e veprimit.
