Prokuroria e Durrësit ka nisur pa humbur kohë, marrjen në pyetje të personave, të cilët janë pjesë e hetimeve për abuzimet me ndërtimet, pas tërmetit të 26 nëntorit.
“Ora News” raporton, se pas sekuestrimit të 200 dosjeve, 30 persona mes të cilëve ndërtues, inxhinierë dhe arkitektë, janë marrë në pyetje.
Përparësi për Prokurorinë kanë dosjet e ndërtimeve që shkaktuan viktima, por paralelisht po vijohet edhe me objektet ku janë evidentuar ndërhyrje në strukturë.
Mësohet se po verifikohen fazat, që nga marrja e lejes së ndërtimit, e deri te zbatimi i tyre.
Gjithashtu po këqyren edhe akt-konstatimet për gjendjen para 26 nëntorit.
Për këtë arsye janë marrë në pyetje edhe zyrtarë që kanë vendosur firma dhe vula.
Sipas “Ora News”, hetimet po ecin me shpejtësi dhe rezultati do të jetë çështje ditësh.
Paralelisht hetimet po vijojnë edhe për Krujën e Thumanën.
Prokurorët po pyesin banorët për akt-konstatimet që u janë dhënë pas tërmeteve të mëparshme.
Njëkohësisht po merret në pyetje projektuesit dhe inxhinierët e pallateve të dëmtuar, ndërsa ka nisur identifikimi i personave që kanë bërë ndërhyrje në strukturë.
Në Tiranë ndërkohë po këqyren dokumentacionet për 770 pallate si dhe po vijojnë verifikmet në terren.
