Ekipi i Dinamos do të rikthehet të luajë në Kategorinë Superiore pas 9 vitesh pritje. Dita e sotme është një festë jo vetëm për tifozët e klubit kryeqytetas, por për të gjithë sportdashësit shqiptarë, pasi Dinamo është një nga klubet më të rëndësishme dhe të titulluara në vendin tonë.
Ekipi i drejtuar nga trajneri Olsi Uku arriti të siguronte fitoren me rezultatin 0-2 ndaj Vorës duke siguruar kështu matematikisht rikthimin në Superligë. Pjesa e parë u mbyll me golin e Djidjiwa i cili shënoi po ashtu edhe në pjesën e dytë për të vulosur fitoren e bluve. Dinamo do të ketë edhe një ndeshje për të luajtur në transfertë me Burrelin, por rezultati i saj nuk do të ndikojë në rikthimin në elitën e futbollit shqiptar.
Hera e fundit që Dinamo ka qenë në Kategorinë Superiore ishte viti 2012, vit në të cilin filluan 9 sezonet e vështira në Kategorinë e Parë. Dinamo është një nga klubet më të rëndësishëm të futbollit shqiptarë me 17 kampionate të fituar dhe 15 trofe të Kupës së Shqipërisë. Pas një mungese kaq të gjatë, më në fund nuk do të kemi më vetëm derbin Tirana-Partizani, por edhe derbin Tirana-Dinamo edhe Dinamo-Partizani, duke e rikthyer futbollin shqiptar në të tjera nivele.
