Rasti i vetëdorëzimit të Klement Balilit, i njohur ndryshe si “Eskobari i Ballkanit” ka bërë “bujë” edhe në mediat italiane.
Mediat italiane shkruajnë se emri i Balilit është publikuar nga mediat greke dhe ai shfaqet si i implikuar në trafikun e marijuanës, e kapur në Greqi në sasi mbi 700 kg.
“Milano Today”, duke cituar “Corriere”, shkruan se droga e sekuestruar nga policia greke kishte si destinacion tregun në Milano të Italisë.
Gjithashtu në raportin e publikuar sot nga media e shtetit fqinj, përshkruhen në detaje të gjithë të dhënat e Balilit dhe postet që ka mbajtur në Sarandë. Sipas “Milano Today”, policia shqiptare ka negociuar për tre muaj radhazi me familjarët e Klement Balilit për t’u dorëzuar.
Fjalët e ish-ambasadorit amerikan, Donald Lu, i cili e quante Balilin si “Peshku i madh” kanë gjetur pasqyrim të detajuar edhe në shtypin italian.
Gjykata e Krimeve të Rënda në seancën e mbajtur javën e kaluar dha masën e sigurisë “arrest me burg” për Balilin, ndërsa hetimet vijojnë nga drejtësia shqiptare mbi aktivitetin e dyshimtë të 48-vjeçarit.
