Një tjetër person i prekur me COVID-19 është nisur mbrëmë drejt Tiranës.
Sipas “Dosja.al”, bëhet fjalë për një 55-vjeçar nga fshati Frakull i Fierit.
Dyshohet se ai është infektuar nga vëllai.
Qarku i Fierit numëron 7 të prekur nga koronavirusi, duke u bërë kështu qytetit i dytë me numrin më të madh të të infektuarve pas Tiranës.
Ndërkohë bilanci i COVID-19 në vendin tonë shkoi në 70 të prekur ditën e djeshme.
Nga këto dy persona kanë humbur jetën, një 73-vjeçare në Durrës dhe një 66-vjeçar nga Lushnja, i cili ndërroi jetë te spitali Infektiv.
Kontakti i pacientit zero është shëruar, ndërsa kryeministri Edi Rama bëri me dije se drejt shërimit është edhe një pacient tjetër.
Tek spitali Infektiv janë të shtruar 35 persona, 3 prej të cilëve mbahen në terapi intensive.
Pjesa tjetër e të prekurve ndodhen të vetëkarantinuar në shtëpi dhe mbahen nën kontroll nga mjeku i familjes dhe Drejtoritë vendore përkatëse të shëndetësisë.
Pas Infektivit, ka filluar edhe funksionimi i karantinës të Kavalishenca në Durrës, ku janë shtruar dy pacientë.
Kryeministri Edi Rama ditën e djeshme, ndryshoi sërish fashat orare të lëvizjes së këmbësorëve.
Që prej ditës së sotme, këmbësorët do të lëvizin nga ora 05:00-13:00, ndërsa e diela është izolim total.
Për të mbikëqyrur zbatimin e masave ndaj COVID-19 dhe për shkak të ndërgjegjësimit të ulët të qytetarëve, ditën e djeshme në rrugë dolën edhe makinat e ushtrisë.
Autoritetet ndërkohë vijojnë të bëjnë thirrje për respektimin e rregullave të higjienës dhe distancimit social.
