Militantët kurdë të PKK-së kanë shpallur një armëpushim me Turqinë, pas një thirrjeje historike nga lideri i tyre i burgosur, Abdullah Öcalan, i cili u kërkoi të dorëzonin armët dhe të shpërbëheshin.
Në një deklaratë të publikuar nga agjencia pro-PKK ANF, komiteti ekzekutiv i organizatës njoftoi se armëpushimi hyn në fuqi menjëherë dhe se asnjë prej forcave të tyre nuk do të ndërmarrë veprime të armatosura, përveç rasteve kur sulmohet.
PKK, e cilësuar si një organizatë terroriste nga Turqia, SHBA dhe BE, ka udhëhequr një kryengritje të armatosur që prej vitit 1984, me synimin për të krijuar një shtet kurd. Konflikti ka shkaktuar mbi 40,000 viktima.
Thirrja e Öcalan për shpërbërjen e PKK-së u përcoll të enjten nga partia pro-kurde DEM, e cila njoftoi se ai kishte kërkuar që organizata të mbante një kongres për shpalljen e shpërbërjes.
PKK u shpreh e gatshme për ta realizuar këtë, por vendosi si kusht krijimin e një mjedisi të sigurt dhe përmirësimin e kushteve të burgimit të Öcalan, duke kërkuar që ai të ketë liri të plotë për të udhëhequr procesin.
Presidenti turk, Recep Tayyip Erdoğan, e cilësoi apelin e Öcalan si një “mundësi historike” dhe theksoi se qeveria do të ndjekë nga afër zhvillimet për të siguruar një përfundim të suksesshëm të këtij procesi.
Edhe Iraku e mirëpriti thirrjen, duke e cilësuar atë si një hap pozitiv drejt stabilitetit rajonal, duke pasur parasysh se prania e PKK-së në territorin irakian ka qenë një burim tensioni midis Bagdadit dhe Ankarasë.
