Kryeministri i vendit Edi Rama, në fjalën e mbajtur para të rinjve në qytetin e Librazhdit, iu është përgjigjur të gjithë atyre që e quajnë arrogant. Rama është shprehur se ka shumë njerëz që ja vënë në dukje, por në synimet e tij ai është kokëfortë dhe këmbëngulës. Ndër të tjera ai shtoi se jeni mësuar me kryeministra të cilët nuk të hedhin sytë në rrugë, e jo më të kthejnë përgjigje në rrjetet sociale apo të komentojnë.
Gjithashtu ai ka ironizuar duke thënë se ata ulen këmbë mbi këmbë para kamerave dhe fillojnë të tregojnë se çfarë mrekullish do të bëjnë. Rama thotë se ai është ndryshe dhe se ai është çdo ditë mirënjohës që ka nderin të jetë në krye të këtij vendi.
“Ka edhe një anë tjetër që ma vënë në dukje shumë njerëz, arrogant. Mbase por më shumë se sa arrogant, do të thoja kokëfortë, këmbëngulës. Deri në pikën që hera herës e tepëroj. Si mund të flasi kryeministri kështu thonë disa, kur unë hyj edhe komentoj. Në fakt kryeministrat me të cilët jemi mësuar, jo në Facebook për të lexuar e komentuar, por as në rrugë nuk ia kthejnë sytë njeriut. Jo të komunikojnë me njerëzit jashtë kamerave, por edhe para kamerave ulen këmbë mbi këmbë dhe fillojnë tu tregojnë njerëzve se çfarë mrekullish do bëjnë. Për mua është ndryshe, unë ndihem dhe jam çdo ditë, çdo sekondë njëri nga ata që më kanë dhënë mundësinë të kem një nder kaq të madh që të jem në krye të këtij vendi”, tha Rama.
