4 ditët e fundit edhe në Kosovë kurba e Covid-19 ka shkuar drejt rënies, pasi gjatë 24 orëve të fundit janë konfirmuar 7 raste të reja, duke çuar në 806 numrin e përgjithshëm të të infektuarve.
Ministri i Shëndetësisë në detyrë Arben Vitia njofton se po ashtu sot janë shëruar edhe 22 persona të tjerë dhe tashmë numri i tyre ka shkuar në 271.
Rastet pozitive janë raste kontakti nga: Komuna e Prizrenit: 5 raste (sipas vendbanimit: 5 raste Prizren) dhe nga 1 rast vendbanimet: Ramjan-Viti dhe Mitrovicë e Jugut.
Deri me tani 22 persona kanë vdekur me COVID-19, të cilët kanë pasur edhe sëmundje të tjera shoqëruese.
Kujtojmë se më herët Vitia ka bërë të ditur se nga data 4 maj, do të fillojë lehtësimi gradual i masave të izolimit, të ndërmarra për të parandaluar përhapjen e koronavirusit.
Lehtësimi i masave, sipas tij, do të zhvillohet në 3 faza.
Faza e parë përfshin periudhën nga 4 maji deri më 18 maj dhe gjatë kësaj kohe do të hapen bizneset, si: ndërtimtaria dhe patundshmëria, tregtia e automjeteve, pjesërisht tregtia me pakicë, pjesërisht riparimi i artikujve personalë dhe i orendive, si dhe zyrat e konsulencës.
Faza e dytë fillon nga 18 maji deri më 2 qershor dhe gjatë saj do të fillojë operimi i bizneseve, si: tregtia me pakicë, dentistët dhe fizioterapeutët, floktarët dhe sallonet e ondulimit, tregu i gjelbër, gastronomia, transporti hekurudhor, transporti urban dhe ndër-urban dhe qendrat e thirrjeve.
Faza e tretë, ndërkaq, hyn në fuqi më 2 qershor e deri në vendimin e radhës dhe do të lejohen transporti urban dhe ndër-urban, taksitë, gastronomia, provimet në arsimin e lartë, testi i maturës dhe arritshmërisë, hapja e kinemave, e teatrove dhe hapja selektive e aktiviteteve sportive.
