Një zjarrfikës është kthyer në simbolin e ndërhyrjes dramatike për shpëtimin e një gruaje të bllokuar në pallatin që u përfshi nga flakët, duke rrezikuar jetën e tij për ta nxjerrë të gjallë nga banesa.
Shefi i shërbimit zjarrfikës, Jonus Murataj, u pa teksa ngjitej nëpër shkallë shumë pranë zjarrit për të arritur tek gruaja, së cilës i vendosi edhe kaskën e tij në kokë për ta mbrojtur. Përveç shpëtimit, ai i dhuroi edhe një përqafim në një moment të mbushur me tension dhe emocione.
“Më mori e bija në telefon e më tha se ka nënën e sëmurë. Kur shkova ta shpëtoja, më tha: ‘Më lër të digjem me gjithë shtëpi’”, u shpreh ai për TCH, duke treguar momentet e vështira gjatë ndërhyrjes.
Sipas autoriteteve, ndërhyrja e shpejtë e zjarrfikësve bëri të mundur izolimin e flakëve në një pjesë të kompleksit, duke shmangur përhapjen e tyre në përmasa më të mëdha që mund të kishin shkaktuar dëme edhe më të rënda.
Ekipet e zjarrfikësve qëndruan në vendngjarje gjatë gjithë natës dhe edhe gjatë ditës së mërkurë, pasi herë pas here riaktivizoheshin vatra të vogla zjarri, duke kërkuar monitorim dhe ndërhyrje të vazhdueshme.
