Ministri i Drejtësisë, Ulsi Manja, ka propozuar largimin nga detyra të Drejtorit të Përgjithshëm të Burgjeve, Agim Ismaili.
Propozimi i ministrit Manja është pranuar dhe miratuar sot nga Këshilli i Ministrave.
Në vend të Ismailit është emëruar Admir Abrija, i cili do të drejtojë tashmë Burgjet.
Kujtojmë që Agim Ismaili u emëruar në postin e Drejtorit të Përgjithshëm të Burgjeve në shkurt të vitit 2019, pas shkarkimit nga kjo detyrë e Stefan Çipës. Ai u emërua si Drejtor i Entit të Banesave. Çipa u emërua te Burgjet në datë 3 Shtator të vitit të kaluar në vendin e Arben Çukos, i cili u shkarkua nga ministrja Gjonaj, ndërsa më pas u prangos në datë 21 Tetor po të vitit 2018. Ndërkohë, para kësaj detyre të re, Ismaili ka qenë drejtor i Autoritetit Kombëtar të Ushqimit (AKU).
Ndërsa Admir Abrija me disa diploma dhe specializime në institucionet më presigjoze në Amerikë, premton reformë në sistemin e burgjeve. Me një karrierë të pasur dhe në krye të disa institucioneve të rëndësishme, duket se zgjedhja e tij është e menduar mirë dhe një risi në sistemin peritencian që prej kohësh përballet me probleme të shumta.
Admir Abrija ka shërbyer edhe në institucione të ndryshme në vend duke mbajtur poste politike. Ka qenë administrator i Bashkisë së Tiranës për zonën e Farkës, Shef Sigurie në Presidencë gjatë kohës kur kryetar shteti ishte Bamir Topi dhe detyra më e rëndësishme si Prefekt i Tiranës.
