Një efektiv policie është pezulluar nga detyra për shkak se nuk i është bindur urdhrit të kolegëve të tij për të ndaluar. Mësohet se efektivi i pezulluar quhet Renato Feri dhe është pikasur muajin e kaluar nga një patrullë e forcave Shqiponja duke udhëtuar me shpejtësi jashtë normave të lejuara në afërsi të Pallatit me Shigjeta.
Ndonëse kolegët e tij i kishin bërë shenjë që të ndalonte, polici jo vetëm që nuk i është bindur, por pasi i ka ofenduar ka shtuar shpejtësinë duke vënë në rrezik dhe efektivët. Ndërkohë që arratia e tij ka zgjatur vetëm pak, pasi është arrestuar, ndërsa gjatë kontrollit në mjet iu gjet dhe një sasi kanabisi.
Ndërkohë burime bëjnë me dije se i ati i Renato Ferit është gjithashtu punonjës në Policinë e Shtetit. Bababi i Renatos, Arian Feri, mësohet se është shef sektori i burimeve njerëzore në Drejtorinë e Përgjithshme të Policisë së Shtetit. Ndërkohë që urdhri i përjashtimit të të riut është bërë me urdhër të drejtorit të Policisë, Muhamet Rrumbullaku.
Kujtojmë e ditën e djeshme u arrestua Albano Velo, i cili dyshohet se është organizatori i vrasjes së biznesmenit Edmond Papa dhe menjëherë pas arrestimit të tij u pezullua nga detyra babai i tij, efektiv policie në komisariatin Nr.4 në Tiranë.
