Ditën e sotme kryeministri Rama ka folur për pensionistët dhe gjendjen në të cilën ato ndodhen aktualisht, teksa çmimet janë më të larta dhe pensionet janë të pamjaftushme.
Sipas Ramës në kushtet ku vendi po përjeton krizë ekonomike si pasojë e luftës, qeveria ka mundur që dy herë të bëjë indeksimin e pensioneve. Kryeministri Edi Rama bën te ditur se po bëhet gati bonusi i fundvitit për pensionistët. Ai thekson se luftë apo jo, target grupi i pensionistëve do ta marrin me patjetër të gjithë një më një bonusin që iu takon.
“Më dridhet zemra kur flas për pensionistët se e di shumë mirë, duke qenë dhe gati 2 metra, më mirë të qep goja se të flas për këtë gjë se nuk e bëjmë dot atë që meritojmë, por të paktën atë që i bën të marrin frymë të papenguar. Në këto kushte, 2 herë i kemi bërë indeksimin. Të paktën, ajo pak të mos bëhet dhe më pak. Nuk kemi bërë herën e dytë paketë rritjeje të përkohshme. Po bëjmë gati bonusin e fundvitit. Luftë apo jo, bonusin e fundvitit do e marrin një me një”, tha Rama.
Kujtojmë që qeveria ka miratuar në mbledhjen e radhës dy vendime në kuadër të zbatimit të paketës së dytë të rezistencës sociale, me qëllim përballimin e pasojave të krizës së rritjes së çmimeve. Vendimi i parë është ai për indeksimin e pensioneve të të gjitha kategorive në masën 6 % dhe vendimi i dytë është ai për rritjen e pagës minimale në vend në masën 34 mijë lekë.
