‘Air Albania’ ka njoftuar se më 22 qershor do të rinisë fluturimet e rregullta dhe se destinacioni i parë do të jetë Stambolli.
Përmes një njoftimi zyrtar kompania ajrore bëri të ditur lajmin, duke shtuar se të gjitha fluturimet e rregullta do të kryhen duke u bazuar mbi marrëveshjet shtetërore bilaterale për hapjen e kufijve pas situatës së shkaktuar nga koronavirusi.
“Më 22 Qershor rifillojmë fluturimet e rregullta dhe destinacioni i parë: Stambolli! Të gjitha fluturimet e rregullta do të kryhen duke u bazuar mbi marrëveshjet shtetërore bilaterale për hapjen e kufinjve. #AirAlbania”, thuhet në njoftimin e “Air Albania”.
‘ Air Albania’ bëhet kështu operatori i katërt që rifillon fluturimet, teksa përpara mbylljes së kufijve nga Covid-19, ‘Air Albania’ filloi fluturimet dhe drejt Italisë dhe planifikonte udhëtimet drejt Londrës.
Kujtojmë se ditën e sotme janë bërë 4 fluturime nga Aeroporti Nënë Tereza që u kryen në këto destinacione: Vjenë, Romë, Milano, Bjellorusi.
Por, aeroporti paralajmëroi se nisjet nga Shqipëria janë ende të kufizuara për personat që nuk janë të pajisur me leje qëndrimi apo pasaportë për destinacionet e sipërpërmendura.
Lejohen të udhëtojnë vetëm rezidentët në Bashkimin Europian dhe nënshtetasit e Bashkimit Europian.
