Kuvendi ka ankimuar në Gjykatën e Apelit, vendimin e Gjykatës së Tiranës, për pushimin e çështjes “ÇEZ”.
Në argumentat e Gjykatës së Tiranës, thuhej se nuk kishte vepër penale.
Hetimet për këtë çështje zgjatën 3 vjet dhe Gjykata e Tiranës e konsideroi të mbyllur dosjen për privatizimin e OSSH nga kompania çeke në vitin 2007.
Vendimi u dha nga gjyqtari Lazër Sallaku, i cili u shpreh se hetimet nuk dhanë rezultat dhe nuk u gjetën elementë të veprës penale.
Në vendimin e gjykatës, thuhej se deputetët socialistë, pretendonin se biznesmeni Nuel Kalaj, kishte ndikuar në çështjen e privatizimit, për shkak të lidhjeve me Shkëlzen Berishën.
Si provë socialistët paraqitën disa emaile të shkëmbyera ndërmjet biznesmenit dhe përfaqësuesve të kompanisë çeke.
Mirëpo gjykata e hodhi poshtë pretendimin e socialistëve, duke arsyetuar se Nuel Kalaj nuk ka pasur ndikim për privatizimin nga ÇEZ.
Në lidhje me çështjen “ÇEZ”, u morën në pyetje një sërë zyrtaresh të lartë, në mesin e të cilëve ish-kryeministri Sali Berisha dhe djali i tij, Shkëlzen Berisha.
Gjithashtu për këtë çështje, qeveria ngriti një komision hetimor të drejtuar nga kreu i Grupit të PS, Taulant Balla.
Komisioni arriti në konkluzionin, se nga procedura e privatizimit, shtetit shqiptar i ishte shkaktuar një dëm prej 414 milion eurosh.
Bazuar në konkluzionet e komisionit hetimor, gjykata rrëzoi prokurorinë dhe hapi sërish çështjen.
Më pas në kuadër të hetimeve, u morën në pyetje, ish-kryeministri Sali Berisha, djali i tij, Shkëlzen Berisha, ish-ministri i Ekonomisë, Genc Ruli dhe biznesmeni Nuel Kalaj.
