Lazër Sallaku është gjyqtari i cili mbylli më 24 janar 2020 dosjen e shumëpërfolur “CEZ”.
Dosja me një dëm ekonomik prej 400 milion eurosh, që kishte protagonistë, ish-kryeministrin Sali Berisha me disa ish-ministra dhe ish-drejtorë, do të jetë objekt verifikimi i ILD.
“Shqiptarja.com”, shkruan, se juristi dhe eksperti i OSHEE, Romeo Kara, ka referuar pranë këtij organi, një dosje me shkeljet e pretenduara të këtij gjyqtari.
Lazër Sallaku para se të mbyllte dosjen “CEZ”, mbylli dhe dosjen e kreut të PD, Lulzim Basha, për lobimin rus.
Sipas juristit, Berisha, Genc Ruli, Ridvan Bode, Florion Mima, Viktor Gumi dhe Sherefedin Shehu, duhet të ishin objekt i SPAK dhe jo të gjykoheshin nga një gjyqtar i shkallës së parë.
Personat e lartëpërmendur janë kallëzuar nga juristi Kara, për shpërdorim detyre, pabarazi në tendera, pastrim të produkteve të veprës penale, ushtrim ndikimi të paligjshëm.
Pavarësisht akuzave, prokuroria kërkoi mbylljen e dosjes për mungesë provash.
Në dosjen e referuar në ILD, thuhet se janë disa persona të tjerë që duhet të ishin pyetur, në mesin e tyre, sekseri kryesor Nuel Kalaj, ish drejtorja në METE Mimoza Vokshi, ish-këshilltarja e Berishës Suzana Guxholli, ish-z/ministri i METE Neritan Alibali, ish z/ministri i Financave Alfred Rushaj, Asllan Sherra, Miran Kopani, Bujar Nepravishta, Durim Kraja, Engjëll Qorlaze, Vasil Pano dhe Shkëlzen Berisha.
Rezulton se organi i akuzës ka marrë në pyetje vetëm 4 ose 5 prej tyre, duke mbyllur dosjen, madje pa verifikuar as tabulatet e biznesmenit Kalaj, i cili u largua nga Shqipëria me 6.8 milion euro.
Në dokumentin prej 33 faqesh, thuhet se pushimi i çështjes nuk është bërë në zbatim të ligjit, si dhe nuk janë bërë përpjekjet minimale për hetimin.
Pas vlerësimit të shkeljes, ILD mund t’i propozojë KLGj një masë displinore për gjyqtarin, deri në shkarkim nga puna.
