Prokuroria e Dibrës ka përfunduar hetimet për dosjen 184 që u hapën pas publikimit të përgjimeve nga BILD. Janë marrë të pandehur 4 persona me akuzën për “shpërdorim detyre” dhe “kanosje të zgjedhësve” në zgjedhjet e vitit 2016.
Çështja është pushuar për të hetuarit e tjerë për shkak të tejkalimit të afatit 3-vjeçar.
Të pandehurit janë Robert Aga ish shef komisariati me Dibër, akuzuar për shpërdorim detyre, Drini Gjeci ish drejtor i arsimit, akuzuar për shpërdorim detyre dhe kanosje të zgjedhësve, Nuri Meda zyrtar në njësine administrative Tomin akuzuar për shpërdorim detyre dhe Hasan Hoti, njësia administrative Lurë akuzuar për kanosje të zgjedhësve.
Pushimi i çështjes është kërkuar për Dionis Imeraj, Imer Lala, Arben Keshi, Bekim Krashi, Afrim Mikli, etj Sipas informacioneve për mediat, Prokuroria ka konstatuar se ata kanë kryer veprën penale të shitblerjes së votës, por për shkak të tejkalimit të afatit 3-vjeçar vepra penale është parashkruar.
Kujtojmë se dosja 184 kaloi disa herë nga Dibra në Tiranë, tek Krimet e Rënda, në SPAK. Si përfundim, SPAK e la në kompetencë të prokurorisë Dibër.
Në atë kohë, Kryeprokurorja e Përkohshme Arta Marku ka dhënë një sqarim zyrtar, sipas të cilit, prokurori i çështjes Klodian Braho, ka ndryshuar cilësimin e veprës penale nga “Grup i strukturuar kriminal, në bashkëpunim të thjeshtë”. Ndërsa prokuroria e Dibrës kishte kërkuar që të mos i transferohej ajo dosje, pasi gjendet në situatën e konfliktit të interesit e pa staf të mjaftueshëm.
/GazetaReforma.com/
