Gjykata e Tiranës ka vendosur masën e sigurisë “arrest në shtëpi” për dy vëllezërit Agim dhe Florenc Domi, të arrestuar pas zbulimit të një sasie të madhe ushqimesh të skaduara në magazinën e kompanisë “Master AL” në Vorë. Të dy do të hetohen në gjendje të lirë, por të detyruar të qëndrojnë në banesë.
Agim Domi, administrator i magazinës, dhe Florenc Domi, magazinier, u arrestuan në kuadër të operacionit “Siguria Ushqimore”, pas një kontrolli ku autoritetet sekuestruan 716 koli dhe qindra kilogramë produkte të përpunuara, përfshirë kroasantë, fruta të thata, fara, pije dhe hurma arabie. Të gjitha këto ishin të skaduara që prej janarit dhe shkurtit të vitit 2025 dhe dyshohet se do të hidheshin në treg me etiketa të falsifikuara.
Në seancën gjyqësore, vëllezërit Domi deklaruan se produktet nuk ishin të destinuara për shitje, por për asgjësim, sapo të siguroheshin kushtet financiare për këtë proces. Megjithatë, prokuroria hodhi dyshime mbi këtë version dhe kërkoi masën “arrest në shtëpi”, me akuzën “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”, parashikuar nga neni 288/1 i Kodit Penal.
Sipas vendimit të Gjykatës, të shpallur më 21 korrik 2025, vëllezërit nuk do të lejohen të largohen nga banesa dhe do të mbikëqyren nga Policia Gjyqësore. Vendimi mund të apelohet brenda 5 ditëve në Gjykatën e Apelit të Juridiksionit të Përgjithshëm.
Si ndodhi ngjarja?
Më 19 korrik, Policia e Shtetit zbuloi një aktivitet të paligjshëm në magazinën e kompanisë “Master AL” në Vorë. Gjatë kontrollit, u gjetën qindra koli me produkte të përpunuara përfshirë kroasantë, fara, fruta të thata dhe hurma, që kishin skaduar prej muajsh, por që dyshohet se ishin përgatitur për t’u futur sërish në treg me etiketa të falsifikuara. Për këtë çështje, përveç vëllezërve Domi, janë proceduar edhe ortaku i kompanisë dhe shoferi i magazinës.
Kontrolli i dobët ushqimor dhe mungesa e mbikëqyrjes në magazinat që furnizojnë tregun shqiptar rrisin ndjeshëm rrezikun për shëndetin e konsumatorëve.
