Prokuroria e Posaçme pas përgjimeve të përba publike për Ervin Matën dhe Erzen Breçanin po mbledh të dhëna edhe për pasuritë e djalit të këtij të fundit, Eralbit.
Kujtojmë se nga përgjimet e “SKY” Ervin Mata, Erzeni dhe i biri Eralbi akuzohen nga SPAK si pjesë e një grupi kriminal.
Pjesë e hetimit pasuror është edhe këngëtarja Elvana Gjata, ndërsa ish-polici Breçani del indirekt i lidhur me një polici private dhe me ndërtim HEC-i ku pasi shënoi humbje për 4 vjet, kërkon 300 mijë euro nga trafiku i drogës i të birit.
Hetimi pasuror i nisur nga Prokuroria e Posaçme ndaj këtyre personave po vijon me mbledhjen e të dhënave për bizneset dhe pronat e luajtshme dhe të paluajtshme.
Përveç 11 të akuzuarve, që janë të përfshirë drejtpërdrejt në ngjarje, SPAK do të hetojë edhe pasurinë e familjarëve të tyre dhe të këngëtares Elvana Gjata, e cila përmendet në dosje për përdorimin e llogarisë së saj bankare nga Ervin Mata.
Deri më tani emri i Ervin Matës nuk rezulton të jetë pjesë e ndonjë biznesi, ndërsa ish-polici, Erzen Breçani rezulton i lidhur me dy kompani, HEC DRITA ENERGY dhe R.O.S.P, kompani me të ardhura të majme dhe xhiro të lartë vjetore.
