Fundjava e kaluar ka shënuar sërish një fluks të lartë lëvizjesh në portin e Durrësit, duke e kthyer këtë nyje detare në një nga pikat më të ngarkuara të kufirit shqiptar.
Sipas Autoritetit Portual Durrës, gjatë periudhës 8–10 gusht kanë mbërritur në port 20,037 pasagjerë dhe 6,349 automjete. Në të njëjtën kohë, nga ky port kanë udhëtuar drejt vendeve të tjera 13,441 pasagjerë dhe 4,086 automjete.
Për të përballuar fluksin, janë vënë në funksion 19 sportele shërbimi, ndërsa tragetet kanë operuar me lundrime të dyfishta. Ky organizim ka synuar lehtësimin e procedurave dhe reduktimin e kohës së pritjes për udhëtarët.
