Të paktën 115 persona kanë humbur jetën si pasojë e sulmeve izraelite në Rripin e Gazës gjatë 24 orëve të fundit, sipas raportimeve të televizionit Al Jazeera me seli në Katar.
Më shumë se 60 viktima u regjistruan në qytetin Khan Younis, ndërsa të paktën 15 të tjerë humbën jetën pas bombardimeve mbi qendrën mjekësore Al Tawbah në Jabaliya, në veri të enklavës.
Sipas të njëjtit burim, ushtria izraelite ndërmori të enjten një valë sulmesh ajrore ndaj tre prej spitaleve kryesore të zonës Al Awda në Jabaliya, Spitalit Indonezian dhe Spitalit Evropian në Khan Younis. Goditje të drejtpërdrejta pati edhe mbi kampin e refugjatëve në Jabaliya dhe zonat përreth tij.
Operacionet ushtarake në Gaza rifilluan më 18 mars, pas ndërprerjes së një armëpushimi të arritur në janar.
Zyra e kryeministrit Benjamin Netanyahu justifikoi ndërhyrjen me refuzimin e Hamasit për të pranuar propozimet e paraqitura nga ndërmjetësit ndërkombëtarë dhe i dërguari special i SHBA-së, Steve Witkoff.
Ndërkohë, Hamasi akuzon Izraelin dhe Shtetet e Bashkuara për prishjen e marrëveshjes dhe për përshkallëzimin e dhunës.
