Ditën e djeshme u bllokua në portin e Vlorës një traget me mbetje toksike, i cili ishte nisur nga Brindisi dhe do të futej në vendin tonë.
Në lidhje me këtë ngjarje policia arrestoi 6 persona.
Në pranga ranë:
Zamir Kornuzi, 46 vjeç, banues në Vlorë pronari i pikës së grumbullimit firma “Kornuzi”.
Arber Cuni, 28 vjeç, banues në Vlorë shoferi i fugonit tip “Iveko”, me targa AA 417 SC.
Agron Brataj, 48 vjeç, banues në Vlorë drejtor operativ i agjensisë “Euroferries”.
Festim Tafa, 72 vjeç banues në Tiranë, kapiteni i tragetit “S.T.DAMIAN”.
Elisabeta Cuni, 55 vjeç, banuese ne Vlorë administratore e firmës së pastrimit “Delfini”.
Kujtim Xhafellari 65 vjeç banues ne Vlorë zëvendes kapiten i tragetit “S.T.DAMIAN”.
Të arrestuarit kanë deklaruar për policinë se në Shqipëri fusnin produkte kimike për pastrim, në emër të një firme “Delfini 1”, i hipnin në furgonin tip “Iveko”, me targa AA 417 SC dhe me anë të tragetit të linjës Brindisi-Vlorë i sillnin në Shqipëri.
Mbetjet e rrezikshme ishin vendosur nëpër enë të mbështjella me një letër të verdhë, që mbante sipër logon e një firme italiane të quajtur “Eni”.
Më pas ato ishin vendosur në disa fuçi të mëdha e të zeza, të cilat po ashtu ishin me logon e verdhë “Eni”.
Ndërkohë bashkëshortja e biznesmenit, Zamir Kormuzi, i cili u arrestua mbrëmjen e kaluar, tha për “News24”, se bashkëshortit të saj iu vunë prangat kur shkoi për të bërë deklarimin në polici.
Më tej ajo shtoi se gjatë pasditesh, furgoni i firmës “Delfini” shkarkoi 5 qese me mbetje të riciklueshme dhe iku.
“Burri shkoi për të bërë deklarimin në polici, por pas 10 minutash i kanë vënë prangat. Kjo është e padrejtë. Kam qenë në biznesin tim dje gjithë ditën. Në 08:30 ka ardhur furgoni i firmës “Delfini”, që shkarkoi 5 qese me mbetje të riciklueshme dhe iku. Nuk kishim asnjë kontratë me këtë firmë. Në 05:30 vjen policia dhe bën foto të qeseve. Policia më mori për deklarim mua, pastaj tha të vijë Zamiri. Policia gjeti një sasi lesh xhami në qese, asgjë tjetër. Nga trageti vijnë mbete ushqimore dhe plastike të riciklueshme. Te ne nuk kanë ardhur asnjëherë mbetje të rrezikshme. Kemi pasur kontrolle nga Inspektorati, por asnjë problem. Kur dyshojmë për mbetje të rrezikshme, lajmërojmë autoritetet”, tha ajo.
Ndërkohë reagim ka pasur edhe nga drejtuesit italianë të anije “S.T.Damian”.
Në një deklaratë për mediat, ata shprehen se firma “Delfini”, është e autorizuar nga porti i Vlorës dhe autoritetet shqiptare për këto lloj shërbimesh.
Deklarata
Si të gjitha anijet e tjera edhe “St Damian” dorezon mbetjet firmave të specializuara dhe të autorizuara nga autoritete të ndryshme lokale. Firma Delfini e autorizuar nga porti i Vlorës dhe autoritetet shqiptare eshte e licencuar për këto trajtime dhe ka një kontratë të rregullt me tragetin “S.T.Damian”. Ashtu sikurse vepron edhe anija Prince dhe shumë anije të tjera që ankorohen në Portin e Vlores. Ashtu sikurse edhe Petrolifera dorëzon mbetjet për përpunim. Firma “Delfini” sapo dorëzon mbetjet i jep anijes edhe një kopje të dokumentit ku ka të shënuar sasinë e mbetjeve të dorëzuara. Dokumetit i bashkangjitet një tjetër dokument, i cili vlen për kontrollin e të gjitha kapitenerive të botës.
