Një auditim i fundit nga Kontrolli i Lartë i Shtetit (KLSH) ka nxjerrë në pah problematikat në menaxhimin e mbetjeve spitalore në Shqipëri, që ndodhin nga magazinimi deri tek çmimet e diferencuara të shpenzimeve.
Raporti thekson se procesi i menaxhimit të mbetjeve spitalore ka mangësi të dokumentimit dhe mungesë standardesh të unifikuara në të gjithë spitalet.
Sipas të dhënave për 39 spitale, gjatë katër viteve të fundit janë shpenzuar rreth 5 milionë euro për trajtimin e mbetjeve spitalore, me një rënie të shpenzimeve në vitin 2023, kryesisht për shkak të uljes së kostove në QSUT “Nënë Tereza”.
Një pjesë e menaxhimit të mbetjeve bëhet përmes kontratave me operatorë privatë, ndërsa një pjesë tjetër përmes autoklavave që janë instaluar në disa spitale, megjithëse jo të gjithë janë funksionalë.
KLSH vë në dukje se në disa spitale, autoklavat nuk janë monitoruar rregullisht, dhe informacioni lidhur me procesin e sterilizimit nuk është centralizuar.
Po ashtu, janë evidentuar kushte të papërshtatshme magazinimi në disa spitale, si në Vlorë, Durrës, Shkodër dhe Korçë, ku ambiente të përshtatshme për ruajtjen dhe përpunimin e mbetjeve mungojnë.
Raporti gjithashtu thekson se kontraktimi i operatorëve ekonomikë për trajtimin e mbetjeve është bërë kryesisht me marrëveshje kuadër, por kjo ka krijuar vonesa dhe grumbullime mbetjesh, pasi kontratat e reja nuk janë lidhur në kohë.
Çmimet për trajtimin e mbetjeve janë variuar nga një vit në tjetrin dhe janë aplikuar çmime të ndryshme për mbetje të njëjta, çka ka krijuar luhatje të kostove./ Monitor
