Ndonëse me krijimin e tryezës për Reformën Zgjedhore u dukë se mazhoranca dhe opozita jashtëparlamentare arritën të dakordoheshin, gjërat kanë filluar të dalin jashtë kornizës.
Kështu, ditën e sotme kryetari i Partisë Demokratike, Lulzim Basha, gjatë një takimi me të rinj dhe intelektualë, është shprehur se Shqipëria ka nevojë për një ndryshim radikal të sistemit zgjedhor.
Basha propozoi ngritjen e një Senati për llogaridhënien e qeverisë duke kërkuar që 40 anëtarët e Senatit të zgjidhen bashkë më 100 anëtarët e Parlamentit dhe më tej shtoi se nuk duhet të ketë tolerancë për ata që përfshihen në shitblerjen e votës.
“Parlamenti me dy dhoma nuk rrit koston për qytetarët, por ndryshon mundësinë për t’u shërbyer njerëzve në mënyrë pozitive. Arroganca dhe presioni i qeverisë nuk do të funksionojnë më për një parlament të fuqizuar me dy dhoma. Qeveria duhet të kërkojë konsensus me të dy dhomat”– u shpreh Basha teksa prezantonte programin e PD për Reformën Zgjedhore.
I menjëhershëm ishte reagimi i PS, ku Damian Gjiknuri me anë të një statusi në Facebook u shpreh se PD me këtë veprim nuk njeh propozimet e veta, teksa akuzoi kryedemokratin se do që të sabotojë tryezën e marrëveshjes për Reformën Zgjedhore.
Më tej, ka shtuar se pret nga PD që të hënën të dorëzojë prezantimet zyrtare për administratën zgjedhore dhe ka rithektheksuar se mazhoranca ka vullnetin dhe detyrimin për ta përmbyllur sa më parë Reformën Zgjedhore duke adresuar plotësisht rekomandimet e OSBE/ODIHR.
Propozimet e Bashës për Reformën Zgjedhore, Gjiknuri: “PD do që të dështojë tryeza”
Së fundmi, Sekretari i Përgjithshëm i PD, Gazment Bardhi, i është përgjigjur Gjiknurit, teksa shkruan në Facebook se maxhoranca shqetësohet se opozita kërkon forcimin e demokracisë dhe dënimin e atyre që shesin e blejnë votën.
“Edi Rama, Damian Gjiknuri dhe Rilindja, janë të VETMIT që nuk duan Reformë të vërtetë Zgjedhore. Ato janë të qartë se me zgjedhje të lira dhe të ndershme, të pandikuara nga “çunat problematikë” apo paratë e krimit dhe korrupsionit, sot do të ishin prapa hekurave dhe jo në qeverisje apo tryeza”, shton më tej Sekretari i Përgjithshëm i PD.
Më tej Bardhi shprehet se maxhoranca ka ndërtuar shtetin privat, që dhunon qytetarët dhe pasuron e mbështet “çunat problematikë”.
Nga ana tjetër, kujtojmë se Këshilli Politik, ku merr pjesë maxhoranca, opozita dhe opozita jashtëparlamentare, po vijon punën për dakordësimin e draftit të Reformës Zgjedhore dhe mbledhja e radhës do zhvillohet të hënën në orën 10:00.
Statusi i plotë
Edi Rama dhe Damian Gjiknuri kanë të drejtë që shqetësohen pse Lulzim Basha dhe opozita luftojnë për forcimin e demokracisë në vend, sundimin e ligjit dhe zgjedhjet e lira dhe të ndershme. Ata janë krejt e kundërta e kësaj. Ata kanë ndërtuar shtetin privat, që dhunon qytetarët dhe pasuron e mbështet “çunat problematikë”. Vizioni dhe alternativa jonë është për shqiptarët dhe jo për Edi Ramën, Damian Gjiknurin dhe, aq më pak, për “çunat e tyre problematikë”! Për këta kemi një tjetër alternativë: Zotimin se kushdo do të mbajë përgjegjësi për çdo krim shtetëror apo elektoral që kanë kryer në të shkuarën.
Edi Rama, Damian Gjiknuri dhe Rilindja, janë të VETMIT që nuk duan Reformë të vërtetë Zgjedhore. Ato janë të qartë se me zgjedhje të lira dhe të ndershme, të pandikuara nga “çunat problematikë” apo paratë e krimit dhe korrupsionit, sot do të ishin prapa hekurave dhe jo në qeverisje apo tryeza. Ne do ta shëmbim modelin e shtetit privat të Edi Ramës dhe do të ndërtojmë një sistem që punon për njerëzit dhe i jep pushtet njerëzve. Partia Demokratike dhe Opozita e Bashkuar ka qenë dhe do të jetë në mbështetje të përmbylljes së Reformës Zgjedhore në afatin e përcaktuar. Për këtë kemi bërë propozime konkrete dhe do të vazhdojmë të bëjmë propozime konkrete, që garantojnë standardet për zgjedhje të lira e të ndershme, përfshirë edhe në takimin e rradhës së ditës së hënë.
