Para disa ditësh ish-presidenti i Shqipërisë Bujar Nishani humbi jetën tragjikisht.
Ish-kryetari i shtetit ndërroi jetë më 28 maj në një spital në Gjermani, ku ishte i shtruar prej një muaji.
Ndërkohë që trupi i pajetë i ish-presidentit Bujar Nishani ka mbërritur në Shqipëri. Mbrëmjen e djeshme makina me arkëmortin e ish-Presidentit Bujar Nishani kaloi pikën e kufirit të Morinës mes Kosovës dhe Shqipërisë, aty ku u zhvillua një ceremoni e improvizuar nga forcat policore kosovare të kufirit në Morinë.
Homazhet janë planifikuar të zhvillohen si më poshtë:
Arkëmorti i tij do të vendoset në sallën “Skënderbeu” në Presidencë, ku familjarët do të presin vizita dhe homazhe nga të afërm, miq dhe dashamirës. Homazhet do të zhvillohen për dy ditë me radhë.
Sot paradite në orën 10:00-14.00 dhe pasdite 16.30-22.00, familja do të presë vizitat e rastit dhe homazhe nga të afërm, miq dhe dashamirës.
Protokolli i shtetit do t’i zhvillojë ato në Presidencë nga ora 10:00 – 12:00 edhe nesër, për ta përcjellë më pas në banesën e fundit në varrezat e Sharrës.
Ndërkohë pas orës 12:00 arkëmorti me trupin e ish-Presidentit, i shoqëruar nga kortezhi mortor, shkon në këmbë deri në urën që kryqëzon unazën me bulevardin Dëshmorët e Kombit, për t’u nisur më pas drejt varrezave të Sharrës, ku do të zhvillohet ceremonia mortore me fjalime lamtumire.
