Xhevdet Plaku dhe gjashtë persona të tjerë janë shoqëruar me masa të rrepta sigurie në Gjykatën e Durrësit, dy ditë pas arrestimit të tyre në një restorant në Gjirin e Lalzit.
Për sigurinë e seancës është angazhuar edhe FNSH-ja, ndërsa të ndaluarit pritet të përballen me akuzat për një sërë veprash të rënda penale.
Të arrestuarit janë:
• Xhevdet Plaku,
• Voltan dhe Jugert Xhani,
• Fatjon Qesja,
• Oltion Hasani,
• Alfred Hasanaj,
• Flobenc Meçja (i njohur edhe si Gega).
Në qendër të këtij grupi qëndron Xhevdet Plaku, 44 vjeç, një emër i njohur për drejtësinë italiane dhe shqiptare, i përfshirë në trafikun ndërkombëtar të drogës.
Plaku është identifikuar me 25 emra të ndryshëm dhe u zhduk në janar të këtij viti nga burgu italian i Barcaglione në Ankona, ku ndodhej në regjim të lehtësuar dhe kishte liri të kufizuar për t’u larguar jashtë ambienteve të burgut. Pasi doli për të hedhur mbeturinat, nuk u kthye më.
Ai dyshohet si drejtues i një organizate kriminale shqiptare që trafikonte kokainë në Holandë dhe Belgjikë.
Emri i tij lidhet edhe me disa ngjarje të rënda në të kaluarën, në qershor të vitit 2000 u arrestua në Itali për vrasjen e një bashkatdhetari, por u lirua në vitin 2014 dhe u zhduk sërish. Më pas u arrestua në Holandë dhe u ekstradua në Itali.
Ndërkohë, në Shqipëri është dënuar me 22 vjet burg për një tjetër vrasje të ndodhur në Durrës, në qershor të vitit 2003.
Një tjetër i arrestuar, Flobenc Meçja, alias Gega apo Drini, ishte në kërkim nga SPAK për një vit si pjesë e dosjes “Plumbi i Artë”. Ai akuzohet për pjesëmarrje në organizatë kriminale dhe sigurim të kushteve për kryerjen e vrasjeve.
Ndërkohë, Voltan Xhani është i dyshuar si organizatori i vrasjes së Elis Rroshkodolit më 30 gusht 2024 në lagjen “Ahmet Haxhiu” në Shkodër. Sipas policisë, ai ka siguruar armët dhe mjetet e përdorura në atentat, ndërsa vëllai i tij, Jugert Xhani, dyshohet se ka ndihmuar në realizimin e krimit. Të dy vëllezërit rezultojnë pronarë të disa bizneseve sipas të dhënave në QKR.
