Kanë mbërritur në vendin tonë 11 700 dozat e radhës të vaksinës anti Covid të Pfizer. Lajmi e ka dhënë kryeministri Edi Rama me anë të një postimi në rrjetet sociale. Ai ka bërë të ditur se çdo javë në shqipëri do të vijnë vaksina sipas kalendarit që parashikohet në kontratat që janë siguruar. Rama thotë se më shumë se 760 mijë vaksina kanë mbërritur në total në vend, ndërsa objektivi është një milion vaksinime.
“11,700 doza të tjera të vaksinës Pfizer sapo kanë mbërritur në Shqipëri.
Çdo javë do të vijnë vaksina AntiCovid, sipas kalendarit të lëvrimit të kontratave që kemi siguruar
Më shumë se 760 mijë vaksina kanë mbërritur deri tani, teksa vijojmë pa u ndalur drejt objektivit tonë për të kryer 1 MILION vaksinime
Shqipëria Buzëqesh
Ska Kohë Për Pushim”, shkruan Rama në postimin e tij.
Kujtojmë që vendi ynë arriti shifrën e 600 mijë vaksinimeve ditën e djeshme. Vaksinat që janë përdorur në Shqipëri kanë qenë nga Pfizer, AstraZeneca, Sputnik V dhe vaksina kineze e Sinovac. Aktualisht në vendin tonë janë 11,296 raste aktive me koronavirus. Ndërkohë, në 24 orët e fundit janë raportuar 30 infektime dhe kanë humbur jetën 4 persona. Që prej fillimit të pandemisë në Shqipëri janë raportuar 131,753 raste pozitive me Covid-19 dhe kanë humbur jetën 2,416 qytetarë.
