Në Gjykatën e Posaçme kundër Korrupsionit dhe Krimit të Organizuar u zhvillua të mërkurën seanca paraprake për dosjen e njohur si “Buka”, ku është i akuzuar ish-zëvendëskryeministri Arben Ahmetaj.
Ahmetaj përballet me akuza për shpërdorim detyre, me pasoja të rënda ekonomike, lidhur me privatizimin e ish-fabrikës së bukës.
Sipas SPAK, ai dyshohet se ka firmosur transferimin e pronës në kundërshtim me vendimet gjyqësore që njihnin pronarët ligjorë, duke shkaktuar një dëm prej 7 miliardë lekësh për shtetin.
Seanca u zhvillua pas vendimit të mëparshëm të gjykatës për kthimin e dosjes në prokurori, me qëllim plotësimin e hetimeve.
SPAK ka dorëzuar prova dhe materiale të reja, ndërsa gjykata ka dhënë kohë mbrojtjes së Ahmetajt të njihen me to. Vendimi për dërgimin e çështjes në gjykim të plotë pritet të merret në 17 korrik, ora 13:00.
Përveç Ahmetajt, SPAK vijon hetimet edhe për shtatë persona të tjerë, përfshirë zyrtarë të Ministrisë së Financave dhe biznesmenin Lirim Fezollarin, i cili dyshohet se përfitoi nga ky proces privatizimi gjatë kohës kur Ahmetaj ishte ministër.
Arben Ahmetaj vijon të jetë në kërkim ndërkombëtar që nga korriku i vitit 2023, jo vetëm për këtë çështje, por edhe për hetimet e tjera të SPAK mbi aferën e inceneratorëve të Elbasanit dhe Fierit.
Për këto raste, ai përballet me një sërë akuzash: “mosdeklarim”, “deklarim të rremë” dhe “fshehje të pasurisë”, “korrupsion pasiv të funksionarëve të lartë shtetërorë”, si dhe “pastrim të produkteve të veprës penale”.
Në vijim të hetimeve, ndaj tij janë ndërmarrë edhe masa sekuestrimi pasuror, që përfshijnë vila, apartamente dhe llogari bankare. SPAK i ka komunikuar zyrtarisht akuzat përmes avokatit të tij në mars 2024.
