Seanca në Apelin e Posaçëm kundër Korrupsionit dhe Krimit të Organizuar për ish-deputetin socialist Alqi Bllako zgjati rreth dy orë.
Bllako ka ankimuar vendimin e Gjykatës së Shkallës së Parë, e cila e dënoi me 4 vite burg për aferën e inceneratorit të Tiranës, një dënim që u reduktua në 2 vite e 8 muaj për shkak të gjykimit të shkurtuar.
Në sallën e gjyqit ishin të pranishëm vetë Bllako dhe avokatët e tij, të cilët kërkuan pafajësi me argumentin se posti i tij si Sekretar i Përgjithshëm nuk e përfshin në kategorinë e zyrtarëve të lartë dhe, për rrjedhojë, nuk qëndron akuza ndaj tij.
Por prokuroria mbrojti qëndrimin e saj duke kërkuar konfirmimin e vendimit të shkallës së parë. Sipas saj, Alqi Bllako ka vepruar në cilësinë e një funksionari të lartë dhe është përgjegjës për aktet e ndërmarra në atë funksion.
Pas shqyrtimit të kërkesave dhe argumenteve, gjykata vendosi që vendimi përfundimtar për Bllakon të jepet më 23 korrik.
Kujtojmë se Alqi Bllako është dënuar më parë me vendim të formës së prerë edhe për inceneratorin e Elbasanit me 2 vite e 8 muaj burg, ndërsa çështja për inceneratorin e Fierit është kthyer për rigjykim në Shkallë të Parë.
