Gjatë ditës së sotme mazhoranca ka miratuar ndryshimin e fundit në Kushtetutë, teksa pritet që organet e vetingut të qëndrojnë në detyrë deri në fund te vitit 2024. Mësohet se në këtë propozim, opozita ka bojkotuar mbledhjen e përbashkët të Komisionit të Ligjeve dhe Këshillit të Legjislacionit dhe e vetmja votë kundër këtij ndryshimi ishte e LSI.
Ndërkohë Partia Socialiste ka ftuar Partinë Demokratike të votojë pro zgjatjes së mandatit të organeve të vetingut, duke vënë në dukje se kjo nuk është një çështje politike e duke theksuar se ndërhyrja në Kushtetutë ka mbështetjen e SHBA dhe BE. Mandati i organeve të vetingut përfundon në muajin qershor; por për 5 vite në filtrin e vetingut kanë kaluar 482 magjistratë, numër ky i vogël pasi duhet të kalojnë 800 magjistratë.
Në bazë të Kushtetutës së miratuar në korrikun e 2016, kur këtyre organeve u përfundon mandati, vetingun duhet ta kryejë Këshilli i Lartë Gjyqësor dhe ai i Prokurorisë. Për të zgjatur mandatin e këtij komisioni dhe për të ndryshuar Kushtetutën duhen 94 vota dhe kjo nuk mund të realizohet pa mbështetjen e PD, pasi mazhoranca ka vetëm 77 deputetë. Në këto kushte të bojkotimit nga ana e PD-së, mbetet për t’u parë çfarë qëndrimi do të mbajë Lulzim Basha.
