Siç edhe ishte parashikuar në rendin e ditës, gjatë kësaj seance në Kuvend, është votuar për ndryshimet në Kodin Zgjedhor.
Mësohet se në Kuvend rrëzimi i dekretit të Presidentit Meta u votua nga 96 deputetë.
Ndërkohë Parlamenti nuk ka pritur as Komisionin e Venecias, të cilës presidenti Meta i kërkoi një opinion për ndryshimet në Kodin Zgjedhor.
Kujtojmë se ndërkombëtarët, mes tyre edhe Komisioneri për Zgjerim në BE, Oliver Varhelyi, i kërkoi kryeministrit Rama që të presë opinionin e Komisionit të Venecias, përpara se të miratonte ndryshimet.
Kryeministri pas kësaj kërkese nga Varhelyi, tha se nuk kanë kohë për të humbur me vonesat që sjell presidenti, pasi institucionet duhet të fillojnë menjëherë me përgatitjen e zgjedhjeve.
Përfundimisht me rrëzimin e dekretit të Metës, mbetet në fuqi formula e koalicioneve, ku partitë duhet të grupojnë kandidatët në një listë të vetme.
Kodi Zgjedhor hyn automatikisht në fuqi pa ndryshimet që pretendonte presidenti Ilir Meta dhe opozita jashtëparlamentare./GazetaReforma.com/
