Provimi i fundit i Maturës, përkatësisht ai i lëndës me zgjedhje Biologji, është shoqëruar me diskutime të forta, pasi maturantët shprehen se niveli i vështirësisë së tyre ishte i lartë.
Sipas tyre pyetjet ishin jashtë programit shkollor që ata kishin bërë ndër vite, teksa ankohen se teza nuk është hartuar në bazë të asaj çfarë ato kanë bërë përgjatë 3 viteve.
Ndërkohë që ministrja e Arsimit dhe Sportit Evis Kushi pas provimit të fundit të maturës, është përgjigjur për dyshimet e shfaqura në lidhje me atë të biologjisë.
Kushi është shprehur e kënaqur me rezultatet. Ajo thekson se pas një pune konsultuese dhe vlerësuese intensive disa ditore me mësues dhe ekspertë të fushës, u bë vlerësimi i cilësisë së testit.
Gjithashtu ajo shton se shumë prej maturantëve kanë shkëlqyer, madje përtej pritshmërive, duke vërtetuar që testi ka qenë një matës i mirë i përgatitjes së gjithsecilit.
Mesazhi i plotë i ministres Kushi:
Të dashur maturantë,
Siç ju premtuam, menjëherë pas provimit të biologjisë u angazhuam maksimalisht me mësuesit dhe ekspertët më të mirë, për të vlerësuar testin dhe për të marrë të gjitha masat e nevojshme që secili prej jush të ketë vlerësim të drejtë, sipas nivelit të arritjeve.
Ju konfirmoj që testi nuk ka asnjë gabim shkencor dhe pyetjet janë hartuar sipas niveleve të vështirësisë, për të diferencuar secilën notë, e për të mos penalizuar as nxënësit e shkëlqyer, por për të vlerësuar të gjithë sipas punës e meritës.
Nisur nga shqetësimet tuaja, kemi punuar ditë e natë me mësuesit vlerësues për të garantuar shpalljen e rezultateve, me cilësi të lartë dhe në kohë sa më të shpejtë.
Jam shumë e kënaqur që shumë prej jush kanë shkëlqyer, madje edhe përtej pritshmërive, duke vërtetuar që testi ka qenë një matës i mirë i përgatitjes së gjithsecilit.
Tashmë rezultatet janë të publikuara në faqen zyrtare të Qendrës së Shërbimeve Arsimore dhe secili prej jush mund të gjejë vlerësimin e testit të tij.
Sot gjatë ditës do të publikoj edhe disa teste të maturantëve që janë përgjigjur saktë dhe kanë marrë pikët maksimale.
Ju uroj të gjithëve shumë suksese në vazhdimin e rrugëtimit tuaj drejt dijes!
