Maturantët në të gjithë vendin përballen sot me provimin e fundit të Maturës Shtetërore, duke përmbyllur zyrtarisht ciklin e testimeve për vitin 2025.
Pas tre provimeve të detyruara, në Gjuhë të Huaj, Gjuhë Shqipe dhe Matematikë, nxënësit do t’i nënshtrohen provimit me zgjedhje, i cili varet nga profili që kanë ndjekur në shkollën e mesme.
Provimi përfshin lëndë të ndara sipas fushave:
• Shkencat e Natyrës: Biologji, Kimi, Fizikë
• Shkencat Shoqërore: Histori, Gjeografi, Qytetari, Psikologji, Filozofi, Sociologji
• Ekonomi dhe Arte: Ekonomi, Histori Muzike, Histori Arti, Histori Baleti
Nxënësit janë udhëzuar të paraqiten në shkollat përkatëse që në orën 08:00, të pajisur me kartë identiteti ose pasaportë, ndërsa testimi nis në orën 10:00 dhe zgjat dy orë e gjysmë.
Gjatë provimit ndalohet kategoria e pajisjeve elektronike, përfshirë telefonat dhe orët inteligjente, për të garantuar rregullsinë dhe integritetin e procesit.
Qendra e Shërbimeve Arsimore ka shpërndarë më herët teste model për të ndihmuar nxënësit në përgatitjen për provimin.
Në procesin e korrigjimit janë përfshirë mbi 640 mësues, ndërsa hartimi, administrimi dhe vlerësimi janë mbikëqyrur në tërësi nga QSHA.
Këtë vit, për të garantuar barazi dhe përfshirje, Ministria e Arsimit ka parashikuar edhe teste të personalizuara për nxënësit me aftësi ndryshe.
Me këtë provim, mbyllet zyrtarisht Matura Shtetërore 2025, një etapë e rëndësishme për mijëra të rinj që synojnë të nisin rrugëtimin e tyre drejt universiteteve.
