Prokuroria e Tiranës ka dërguar për gjykim shtetasin izraelit, Rafael Genish, dhe 38 shqiptarë, të cilët janë përfshirë në një skemë mashtrimi me call center dhe akuzohen për shkaktimin e një dëmi prej 2 milionë euro.
Hetimi, i cili u zhvillua në bashkëpunim me autoritetet gjermane të Braunscweig, ka zbuluar mashtrime kompjuterike për përfitime financiare, duke përdorur platforma fiktive si “CFD-Tradingplattform” dhe “FX-Leader”.
Gjatë hetimit u vërtetuan se transferta në vlera të larta monetare u kryen drejt një qendre thirrjesh (call center) me emërtimin “Capital SHPK 1001” me adresë Rruga Him Kolli, pas Golden City Hotel, Tiranë, ku vetëm në një rast u transferuan gjithsej 254.990.00 euro në llogari të ndryshme të platformës “fx-leader.com”.
Të gjitha transfertat e kësaj skeme, u nxitën nga autorët e kësaj vepre penale të konsideronin investimin e pasurive të tyre në një mënyrë fitimprurëse, ndër të tjera përmes reklamave në internet dhe në rrjetet sociale.
Autorët i kontaktonin menjëherë në telefon dhe krijohej një lidhje besimi me “klientin” e pretenduar. Fillimisht viktimat tundohen të investojnë në sasi të vogla me premtimin se ndërmjetësi (broker) i pretenduar i faqes së investimeve, do të realizonte një fitim të madh me investimin e aksioneve dhe kripto valutave.
Faqja e internetit “fx-leader.com” merrej në mënyrë fiktive me biznes në fushën e trasanksioneve financiare me të ashtuquajtura opsione binare. Për këtë qëllim krijoheshin posaçërisht qendra thirrje (call center), me anë të të cilave “klientet” kontaktoheshin nga një konsulent financiar personal, për t’i joshur që të bëjnë investime të larta.
Të gjitha fitimet dhe humbjet stimuloheshin virtualisht. Një algoritëm përkatës bënte që fitimet e fillimit t’i shtynin pjesëmarrësit për të investuar shuma të mëdha parash. Në momentin që personi i prekur kërkonte që të merrte fitimet e tij apo depozitat, kjo gjë nuk mundësohej. Sipas qëllimit fillestar, sistemi ishte i ndërtuar në formë të tillë që t’i mbante varur personat e prekur deri sa tu merrej mjaftueshëm para në mënyrë të paligjshme, dhe më pas faqet mbylleshin”, bën me dije Prokuroria.
Gjatë hetimit janë përpiluar 12 Letër Porosi në shtete të ndryshme të Europës, ndër to një e ardhur nga Republika Çeke ka treguar informacione të rëndësishme.
Shtetasi çek, J.L, ka deklaruar se në periudhën Janar-Shkurt 2021 është kontaktuar nga ndërmjetës financiar që e udhëzuan të investonte në bitcoin.
Pas një investimi prej 285.000 CZK, komunikimi me ndërmjetësin është ndërprerë dhe ai nuk ka marrë paratë e investuara.
Pastrimi i këtyre vlerave është realizuar përmes transfertave të falsifikuara dhe fatura fiktive në banka të shteteve me risk të lartë për aktivitetin e pastrimit të parave, si Lituania, India, Singapori, Hungari, Estoni dhe Malta.
