Një 19-vjeçar i shpallur në kërkim është arrestuar nga policia në Durrës, si pjesë e një skeme mashtruese që i ka shkaktuar shtetit një dëm prej 3 milionë eurosh përmes manipulimit të tatimit mbi vlerën e shtuar.
I riu, Luvjano Topi, ishte shpallur në kërkim disa muaj më parë dhe ndaj tij Gjykata e Durrësit kishte vendosur masën e sigurisë “arrest në burg”.
Ai është një nga shtatë personat e përfshirë në këtë veprimtari të paligjshme, që sipas hetimeve, konsistonte në raportimin e të dhënave financiare fiktive nga subjekte të ndryshme, me qëllim shmangien e detyrimeve tatimore.
Operacioni “Skema”, i nisur gjashtë muaj më parë, identifikoi personat përgjegjës dhe dokumentoi aktivitetin mashtrues që dyshohet se ka dëmtuar buxhetin e shtetit me miliona euro.
Policia e Durrësit bën të ditur se vijojnë kërkimet për të kapur edhe gjashtë personat e tjerë të përfshirë në këtë rast, ndërsa materialet hetimore janë referuar në Prokurori për veprime të mëtejshme ligjore.
