Masat e marra në shkolla para rikthimit të maturantëve, Shahini: Do ndiqet protokoll strikt
Ditën e sotme, ministrja e Arsimit Besa Shahini ka deklaruar se po vazhdon puna përgatitore për masat që po merren për rikthimin e maturantëve në shkollë.
Këta të fundit janë njoftuar se do rikthehen në ambientet e shkollave të tyre në datën 18 maj.
Ministrja është shprehur se në shkolla do të ndiqet një protokoll strikt për hyrjet dhe daljet, madje janë vendosur postera e sinjale orientuese në të gjitha ambientet e shkollave.
“Vijon puna përgatitore në shkolla për masat që sigurojnë distancimin fizik mes nxënësve. Gjatë gjithë këtyre ditëve janë vendosur postera dhe sinjale të tjera orientuese, si dhe është kryer dezinfektimi i shkollave për të qenë gati të mirëpresim maturantët më datë 18 maj”, shkruan në rrjetin e saj social ministrja Shahini.
Është njoftuar edhe nga kreu i qeverisë Edi Rama se mes datave 18 maj-5 qershor do të ketë një hapje të pjesshme të shkollave vetëm për maturantët.
Gjatë kësaj kohe ata do të zhvillojnë lëndët që janë provime nga shteti.
Ndërsa ditën e sotme, një grup studentësh janë ngritur në protestë para godinës së Ministrisë së Arsimit.
Ata kanë dashur t’i thonë ministres se kanë pasur probleme me mësimin online, i cili sipas Shahinit po shkon shumë mirë.
Gjithashtu studentët kanë shtuar se shumica e tyre nuk kanë internet për të ndjekur mësimin online.
