Mali i Zi ka shpallur tri ditë zie kombëtare duke nisur nga data 2 janar 2025, pas tragjedisë që ndodhi në Cetinje, ku një person, Aco Martinoviç, kreu një masakër, duke vrarë 12 persona, përfshirë fëmijë dhe anëtarë të familjes së tij.
Krimi ka ndodhur në pesë vendndodhje të ndryshme, ku Martinoviç fillimisht vrau katër persona në tavernën “Velestovo”, pas një incidenti me një mysafir, dhe më pas udhëtoi në tri lokacione të tjera në Cetinje, ku vazhdoi vrasjet.
Në mes të viktimave janë shtatë burra, tre gra dhe dy fëmijë. Katër persona të tjerë janë plagosur rëndë, dhe ndodhen në spital, ndërsa tre prej tyre janë në gjendje të rëndë.
Martinoviç ishte shpallur si autor i krimit, por pas një ndjekjeje të gjatë, ai u rrethua nga policia dhe, pasi refuzoi të dorëzohej, kreu vetëvrasje.
Autoritetet malazeze kanë shprehur trishtim dhe kanë nisur hetimet për zbardhjen e motiveve të mundshme pas këtij akti të dhunshëm.
Sipas informacioneve të para, Martinoviçi kishte pasur një të kaluar kriminale, me një dënim për sjellje të dhunshme në vitin 2005 dhe një dënim të mëtejshëm në vitin 2022 për armëmbajtje pa leje.
Ky është i dyti rast i masakrës në Cetinje në dy vjet e gjysmë, pasi më 12 gusht 2022, Vuk Borilović vrau 10 persona në një ngjarje të ngjashme, duke lënë qytetin dhe Malin e Zi të tronditura.
