Masakra e Dobraçit/ AMP con në hetim disa efektive policorë

Katër efektivë të Njësisë së Shqiponjave janë nën hetim pas masakrës së Dobracit, pasi akuzohen për shpërdorim detyre.

Burimet bëjnë me dije se pas ngjarjes, një person i tretë dyshohet të ketë qenë në makinë me viktimat Hamza Lici dhe Arlind Bushati, të cilët u vranë në një pritë me armë zjarri. Po ashtu, viktima të tjera nga rrethana të ngjashme ishin Flutura dhe Bashkim Basha, të cilët u aksidentuan me motor gjatë kohës së atentatit.

Dyshohet se personi i tretë ka qenë ende në vendngjarje kur ndodhi vrasja dhe nuk u ndalua nga efektivët e Shqiponjave. Ky zhvillim vjen një ditë pas shpalljes së moskompetencës nga Prokuroria e Shkodrës, e cila ia kaloi hetimet SPAK-ut.

Identifikimi i personit të tretë, i dyshuar të jetë Ibrahim Lici, mbetet sfida kryesore për prokurorët e Posaçëm.

Në makinën ku u vranë Lici dhe Bushati, u gjetën tre armë, ndër të cilat një prej tyre ishte në sediljen e pasme. Po ashtu, u zbuluan gjurmë gjaku në këtë sedilje, çka mendohet se personi i tretë mund të ketë qenë i plagosur.

Ky fakt ka çuar në kontrolle të klinikave private shëndetësore. Prokuroria po punon për të verifikuar dy pista kryesore për identifikimin e personit të tretë: shenjat e gishtave dhe pamjet e kamerave të sigurisë, të cilat tregojnë një person që ndodhet afër vendit të krimit pak minuta pas masakrës.