Kosova dhe Serbia kanë arritur marrëveshjen sa i përket reciprocitetit të targave dhe çtensionimit të situatës në kufi. I dërguari special i Bashkimit Evropian për dialogun mes Kosovës dhe Serbisë, Mirosllav Lajçak, e ka bërë diçka të tillë me dije, me anë të një letre të publikuar në Twitter.
Në letrën e publikuar nga Lajçk shihet se marrëveshja ka tri pika kyçe, që kanë të bëjnë me largimin e njësive speciale dhe barrikadat e vendosura në Jarinjë dhe Bërnjak. Në pikën e dytë thuhet se nga 4 tetori do të nisë së zbatuari regjimi i letrave ngjitëse, në vend të heqjes së targave të makinave të regjistruara në Kosovë dhe Serbi. Kjo do të jetë masë e përkohshme deri në një zgjidhje të përhershme.
Dhe pika e fundit përcakton 21 tetorin se datën kur ekipi me zyrtarë nga BE, Kosova dhe Serbia, do të takohen për të gjetur një zgjidhje të përbashkët.
We have a deal! After two days of intense negotiations, an agreement on de-escalation and the way forward has just been reached. I thank Besnik Bislimi and Petar Petkovic for their readiness to negotiate and agree for the good of the people. pic.twitter.com/OuhuUWvuG0
— Miroslav Lajčák (@MiroslavLajcak) September 30, 2021
Tri pikat e marrëveshjes:
- Njësitet speciale policore të vendosura në pikëkalimet e përbashkëta kufitare në Jarinjë dhe Bërnjak do të largohen bashkë me barrikadat, duke nisur nga 2 tetori, nga ora 08:00 deri në orën 16:00 të asaj dite. Misioni i NATO-s në Kosovë, KFOR do të angazhohet në këto dy pika në Jarinjë dhe Bërnjak, para nisjes së tërheqjes të zyrtarëve policorë dhe barrikadave, dhe do të mbetet aty për dy javë për të garantuar sigurinë.
- Nga 4 tetori, do të nisë së zbatuari regjimi i letrave ngjitëse, në vend të heqjes së targave të makinave të regjistruara në Kosovë dhe Serbi, si masë e përkohshme, deri në gjetjen e një zgjidhjeje të përhershme.
- Më 21 tetor do të nisë punën një ekip i përbërë nga zyrtarë të Bashkimit Evropian, Prishtinës dhe Beogradit për të gjetur një zgjidhje të përhershme. Brenda gjashtë muajve, prej nisjes së takimit të parë, i ashtuquajtur Grup Punues, do të prezantojë gjetjet për një zgjidhje të përhershme në formatin e dialogut të nivelit të lartë.
