Në Bruksel sot, në mes të palëve nga Kosova dhe Serbia, është arritur dakordësia mbi udhërrëfyesin për zbatimin e marrëveshjes për energjinë nga 2013, e cila nuk kishte gjetur zbatim prej kaq kohësh.
Miroslav Lajcak, emisari i BE-së për dialogun Kosovë-Serbi e dha këtë lajm të rëndësishëm për rajonin ditën e sotme, duke njoftuar se Kosova dhe Serbia janë pajtuar për miratimin e udhërrëfyesit për zbatimin e Marrëveshjeve për Energjinë në kuadër të dialogut të Brukselit.
“Me kënaqësi të njoftoj se Kosova dhe Serbia sapo miratuan Udhërrëfyesin për Zbatimin e Marrëveshjeve të Energjisë në kuadër të Dialogut të lehtësuar nga BE-ja. Ky është një hap i madh përpara”, njoftoi Miroslav Lajçak.
Në këtë takim ishin të pranishëm zëvendëskryeministri i Kosovës, Besnik Bislimi edhe shefi i delegacionit të Serbisë, Petar Petkoviç.
Përmes kësaj marrëveshje të arritur, qytetarët në katër komunat në veri të Kosovës,të banuara më shumicë serbe, që nuk kanë paguar drita nga 1999, detyrohen të paguajnë faturat.
Kjo marrëveshje është komentuar edhe nga kryeministri Edi Rama, i cili ditën e sotme me anë të një postimi në rrjetin social Facebook, ka përshëndetur marrëveshjen e arritur midis Kosovës dhe Serbisë mbi energjinë. “Gjë shumë e mirë marrëveshja e firmosur mes Kosovës e Serbisë për energjinë në Veri. Kjo është rruga e duhur. Të tjerat janë humbje kohe duke rrejt veten!”, shkruan Rama.
