Zëvendëskryeministri i kosovës Besnik Bislimi është qëlluar me tortë dhe pije ‘milkshake’ nga disa aktivistë të Partisë SocialDemokrate teksa ai i drejtohej hyrjes së një ndërtese. Incidenti ka ndodhur pasditen e sotme në shenjë revolte nga partia opozitare lidhur me marrveshjen që arriti kryeministri Albin Kurti në takimin në Ohër për zbatimin e planit të BE-së ku përfshihet edhe Asociacioni. Pamjet janë publikuar nga vetë kreu i PSD-së, Dardan Molliqaj, i cili krahas videos shkruan se ‘Zajednica’ (Asociacioni i Komunave Serbe në serbisht) është pranuar nga kryeministri Kurti.
“Tortë e milkshake për ‘Zajednicën’. E gëzofshin këta që e pranuan! Kurse ne, qytetarët e Kosovës, do ta kundërshtojmë atë e të kërkojmë masivisht dorëheqjen e tyre. Prandaj, protestojmë të shtunën, me 25 mars, në orën 14:00”, shkruan ai.
Takimi në Ohër
Kosova dhe Serbia mbyllën me dakordësim mbi aneksin e zbatimit të planit evropian në Ohër, i cili do të jetë i detyrueshëm për tu zbatuar nga të dy dy palët në momentin e publikimit. Përfaqësuesi i Lartë i unionit për Çështjet e Jashtme dhe Politikat e Sigurisë, Josep Borrell, tha se Kurti dhe Vuçiç nuk e kanë firmosur dokumentin. Pas 12 orëve negociata, ai doli në një deklaratë për media ku u shpreh se bisedimet u ndalën në hapa praktikë dhe më në fund mes dy vendeve pati bisedime konkrete dhe dy palët u pajtuan për aneksin e propozimit evropian. Për rreth 10 orë u diskutua vetëm mes Albin Kurtit, Borrel, Vuçiç dhe Lajçak, por në një moment u kërkua me urgjencë prania e Gabriel Escobar. Propozimi evropian që përfshin 11 pika për normalizimin e marrëdhënieve ndërmjet Kosovës dhe Serbisë konsiderohet si një nga mundësitë më të mira për të çuar rajonin përpara dhe për të krijuar kushte paqësore për të gjithë njerëzit që jetojnë në rajon.
