Ditën e sotme Ish-Presidenti i Dhomës Amerikane të Tregtisë, Mark Crawford u shpreh se sistemi i taksave duhet të jetë sa më i thjeshtë në mënyrë që të mos nxitet dhënia e ryshfetit. Sipas z. Crawford sistemi fiskal nuk duhet ndryshuar shpesh dhe sidomos kur nuk ka ndryshim qeverie.
“Ato sektorë të ekonomisë që tërheqin më shumë investitorë të huaj janë ato sektorë që janë më stabël dhe që nuk kanë burokraci. Ne shikojmë se kur ka shumë ndryshime dhe burokraci ka edhe shumë korrupsion. Kur gjërat janë të thjeshta nuk ka nevojë për bakshish apo ‘respekt’ tek anëtarët e qeverisë”, thotë ai.
Mark Crawford u shpreh gjatë një interviste për Euronews Albania se qeveria duhet t’u japë Dhomave të Tregtisë më shumë kohë për t’u konsultuar me ndryshimet.
Pavarësisht se Shqipëria tha ai përpiqet që të konkurrojë me SHBA, Kinën apo Rusinë në fakt garën e ka me vendet fqinje. Investitorët e huaj theksoi ai nuk duan që sistemi fiskal të ndryshojë çdo vit pasi këtu vihet në risk investimi.
“Unë jam duke investuar në Shqipëri, por janë duke investuar gjithashtu në Mal të Zi dhe Kosovë. Ka disa pika interesante në Kosovë që kanë zero taksë për divident. Këto janë shumë tërheqëse për ne dhe normalisht që do të shkojnë në Kosovë. Ne në biznes nuk përfshihemi në politikë dhe sistemi fiskal të mos ndryshohet shpesh sepse ne duhet të planifikojmë”, tha z. Crawford.
Dhoma Amerikane ka kërkuar shtyrjen e paketës fiskale, pasi qeveria nuk e ka konsultuar atë me grupet e interesit. Biznesi amerikan nuk pajtohet me ligjin për tatimin e pagave, duke propozuar një skemë të re e të qëndrueshme për këtë çështje. Dhoma Amerikane propozon rregullim dhe qëndrueshmëri të ligjit për Tatimin mbi të Ardhurat, sipas modeleve ndërkombëtare.
