Prej disa kohësh republika e Maqedonisë së Veriut ka hapur portat e shkarkimit në Strugë dhe nëpërmjet ujit të liqenit të Ohrit po balancon rezervat hidroenergjetike në lumin e Drinit të Zi.
Kjo ka ardhur si pasojë e mungesës së gjatë të reshjeve dhe thatësirës, edhe pse nga ana tjetër një hapje e portave tej normave të lejuara, po shkatërron brigjet e liqenit në Pogradec.
Liqeni i Ohrit i cilësuar si më i vjetri në Europë dhe me një biodiversitet të rrallë, ketë vit po përballet me rënie të nivelit.
Por as ky fakt dhe as shkatërrimi i bregut shqiptar nuk kanë shqetësuar deri tani as ministrinë e Turizmit, të Blendi Klosit, dhe as ministrinë e Bujqësisë dhe Administrimit të Ujërave, të Blendi Çuçit.
Stafet e dy ministrave socialistë dhe as vetë ata, nuk kanë lëvizur deri tani as “gishtin e vogël” për këtë shkatërrim që po i bëhet bregut liqenor në Pogradec.
Ndërkohë kujtojmë këtu edhe deklaratën e vet ministrit të Turizmit, Klosi, bërë vetëm pak ditë më parë në një debat televiziv, ku u shpreh se “sezoni turistik në Shqipëri do të vazhdojë për gjatë gjithë vitit”.
Por ndërkohë që sezoni turistik po “vazhdon”, ministri Klosi nuk ka reaguar për këtë fenomen që po shkatërron bregun shqiptar në Pogradec.
Uji është tërhequr me të paktën 20 metra nga bregu, ndërkohë që janë krijuar duna rëre në brigjet e tij.
Hapja e portave të Drinit të Zi nga ana e autoriteteve të Maqedonisë së Veriut, në mënyrë të përsëritur por edhe mungesa e reshjeve, shkakton rënie të nivelit të liqenit në pjesën Shqiptare.
Ky liqen një pasuri e çmuar për dy vendet, përdoret nga shteti fqinjë si një basen për të plotësuar nevojat e prodhimit të energjisë elektrike, duke shkaktuar kështu dëme në ekosistemin e liqenit.
Kryesisht në pjesën e Tushemishtit, tërheqja e bregut vihet re më së shumti ndërsa mes dunave të krijuara këtu, flamingot duket se kanë gjetur kushte të përshtatshme për të qëndruar.
Janë 16 individë që gjenden në këtë pjesë të bregut ndërsa për specialistët, kjo është diçka e rrallë.
Flamingot kanë vizituar liqenin e Ohrit dhe janë kthyer në një tjetër atraksion.
Thuajse një vit më parë, pjesa shqiptare e Liqenit të Ohrit, fitoi statusin e sitit të UNESCO-s, duke u listuar si pasuri e trashëgimi kulturore dhe natyrore.
/GazetaReforma.com/
