Pasojat e tërmetit në qytetin e Durrësit nuk kanë të sosur.
Në Manëz drama për shumë familje vijon ende.
RTV ORA bën me dije se 43 familje jetojnë në konteniere në kushte shumë të vështira.
Në këtë kamp të improvizuar ka banorë nga të gjitha moshat, nga 2 muajsh deri në 85 vjeç.
Banorët thonë se po mbijetojnë në mes të vështirësive.
Në çdo kontenier jetojnë 2 familje, çka bën që shpesh mos të ketë vend për të fjetur për të gjithë.
“Ne jemi katër pjesëtarë familje, kemi vetëm dy krevate të cilët i ka marrë vëllai te çadrat. Ne flemë përtokë, unë dhe motra, ndërsa vëllai dhe mami flenë në krevat“- dëshmon njëri prej banorëve.
Po ashtu, vështirësi haset edhe në furnizimin me ujë.
“Vjen vetëm në mëngjes nga ora 7 ose 8. Një orë rri, deri në 9. U bë dy javë që nuk ka hedhur pikë uji në trup, gjynah, është e vogël. Me u la ditë për ditë dhe do ato terezitë e veta.Do bleni dhe do të gatuani vetë, po ku të gatuajmë? Nuk ke ku të lash enët”.- thotë një tjetër e strehuar.
Problemi tjetër është i ftohti, pasi ndonëse kondicionerët janë vendosur, ata nuk punojnë.
Shqetësimi më i madh është për fëmijët e vegjël, të cilët nuk e përballojnë dot të ftohtin.
“Kjo ftohet dhe duhet patjetër diçka me e ngroh fëmijën.”
Durrësi numëron plot 24 viktima dhe rreth 11 mijë persona të pastrehë nga tërmeti i 26 nëntorit.
