Mbi 25 mijë mësues i kanë kryer të dyja dozat e vaksinës kundër koronavirusit. Ministrja e Shëndetësisë, Ogerta Manastirliu, shprehet se procesi i vaksinimit do të vijojë deri garantimin e një viti akademik të qëndrueshëm, ndërsa njofton se 42 mijë e 780 arsimtarë kanë marrë vaksinën për COVID.
“Më shumë mbrojtje për mësuesit dhe pedagogët, me vaksinimin masiv të atyre që përçojnë dije dhe vlera të pazëvendësueshme për brezat e rinj, për të garantuar qëndrueshmëri në vitin e ardhshëm akademik. 42,781 vaksinime janë kryer deri tani për arsimtarët. Mbi 25 mijë mësues i kanë kryer të dy dozat e vaksinës”, shkruan Manastirliu, bashkangjitur videos së publikuar në rrjetin social “Facebook”.
Ditën e djeshme, kryeministri i vendit, Edi Rama së bashku me ministren Ogerta Manstirliu, kanë vizituar laboratorin e ri të hapur në ambientet e QSUT. Sipas njoftimit publik të bërë nga Ministria e Shëndetësisë, ka nisur një kapitull i ri i modernizimit të shërbimit shëndetësor.
Manastirliu ka informuar kryeministrin Edi Rama se tashmë në QSUT ka filluar implementimi i projektit PPP për laboratorët që do të përhapet dhe në 18 spitale të tjera të vendit. Sipas saj, ky projekt do të sjellë një rritje me mbi 50% të llojshmërisë së testeve e analizave laboratorike në spitalet rajonale.
