Jamambër Malltezi ka reaguar ashpër për skandalin e mbetjeve të rrezikshme që ndodhen në Porto Romano të Durrësit, duke akuzuar autoritetet shtetërore për fshehje dhe mosveprim. I ftuar në një intervistë për SYRI TV, Malltezi u shpreh se institucionet shqiptare “kanë larë duart” me këtë çështje, të cilën e cilësoi si një “krim të rëndë që në çdo vend të botës të çon në burg”.
“Kemi të bëjmë me mbetjet e rrezikshme. Çfarë tregon ajo aferë? Ajo aferë tregon që gjithë shteti është një shtet i kalbur që noton vetëm në korrupsion. Pra, nuk kishte një copë letër të saktë. Gjithë ky shtet nuk kishte një copë letër, por ndërkohë kishte çuar 101 kontejnerë. Pra, asnjë copë letër, ndërkohë që ishin bërë dy vaporë plot me kontejnerë. Kjo tregon çfarë është shteti dhe sa të besueshme i kemi institucionet shtetërore,” deklaroi Malltezi.
Ai shtoi se çështja është fshehur qëllimisht dhe se autoritetet po simulojnë hetime për të shmangur përgjegjësitë. “I fshehën në Porto Romano. Si i mbajtën në Porto Romano, në çfarë kushtesh? Si e verifikon ti tani? Kjo është thjesht për të larë duart, asgjë tjetër. Mund të jenë vjedhur, ndërkohë mund të jenë nxjerrë edhe kontejnerët fare, mund të dalë edhe rërë aty, kot pa asnjë lidhje. Pse po e bën pas një viti? Çfarë besueshmërie jep ti si shtet? Drejtësia e bën këtë punë,” tha ai.
Malltezi kritikoi ashpër edhe mospranimin e ndihmës nga ekspertët ndërkombëtarë, duke theksuar se “erdhën ata të Bazelit, ofruan ta bënin pa lekë dhe këta nuk pranuan”. “Kush nuk pranoi? Autoritetet shqiptare, përfshirë autoritetet e drejtësisë dhe Edi Ramën që është i gjithi, noton në këtë aferë, është i zhytur. Sepse është aferë ‘trafikim ndërkombëtar i lëndëve të rrezikshme mjedisore’. Është krim nga më të rëndët që mund të bëhet. Në çdo legjislacion, ky shkon në burg, Edi Rama,” deklaroi ai.
Duke përfunduar, Malltezi e cilësoi situatën si një “ballo me maska” të pushtetit, ku gjithçka është fshehur nën petkun e formaliteteve bosh. “E gjitha kjo është një tjetër ballo me maska, sepse nuk janë mbajtur në kushtet që detyrohesh të mbash mbetjet e rrezikshme. Ato thjesht janë lënë në kontejnerë. Ne nuk e dimë si janë këta kontejnerë, a janë të derdhur, a janë të ruajtur, të fiksuar…”, përfundoi Malltezi në intervistën për SYRI TV.
