Zyrtarisht, ditën e sotmë është emëruar në detyrë si Drejtor i Përgjithshëm i Policisë së Shtetit, Muhamet Rrumbullaku. Pas këtij vendimi ka ardhur një reagim nga kreu i grupit parlamentar të PD-së, Enkelejd Alibeaj. Përmes një mesazhi në “Facebook”, Alibeaj thekson se ndryshimet ne kupolën e Policisë janë thjesht makiazhi i radhës për të mbuluar dështimin e plotë të qeverisë në përballje me krimin e organizuar.
“Ndryshimet ne kupolën e Policisë së Shtetit janë thjesht makiazhi i radhës për të mbuluar dështimin e plotë të kësaj qeverie në përballje me krimin e organizuar.
Kriminaliteti në shifra alarmante, lidhjet tashmë të faktuara të segmenteve të Policisë me bandat dhe implikimi i këtyre të fundit në procesin elektoral të 25 prillit është dëshmi e qartë se Edi Rama dhe qeveria e tij e kanë të pamundur të përballen dhe aq më tepër të luftojnë me krimin.
Lëvizjet e sotme në strukturën e Policisë si pjesë e riciklimit të figurave të vjetra qartas nuk mund të ndihmojnë në rikthimin e normalitetit të sigurisë në vend. Që mbi të gjitha është pjesë e vullnetit të munguar politik të kryeministrit dhe e hallkave që pengojnë luftën ndaj krimit dhe rikthimit të besimit të qytetarëve tek qetësia dhe rendi publik.”, shkruan Alibeaj.
