Autoritetet në shtetin qendror të Guanajuatos në Meksikë kanë zbuluar 32 trupa në një pronë në komunën e Irapuatos, ku thuhet se gjysma e tyre janë identifikuar deri më tani.
Sipas Zyrës së Prokurorit të Shtetit, trupat janë gjetur në varre të fshehta në zonën La Calera, në pjesën veriore të Irapuatos, rreth 320 kilometra nga kryeqyteti Meksiko. Ekipet mjeko-ligjore ndodhen në terren prej 30 korrikut, duke kryer ekspertiza dhe procesin e identifikimit të viktimave.
Zbulimi i varrezës masive vjen vetëm pak javë pas një sulmi të armatosur gjatë një feste në rrugët e Irapuatos, ku mbetën të vrarë 12 persona.
Guanajuato është një nga shtetet më të prekura nga dhuna në Meksikë, për shkak të përplasjeve të ashpra midis Kartelit të Gjeneratës së Re Jalisco dhe grupit rival Santa Rosa de Lima. Vetëm në periudhën janar-korrik të këtij viti janë regjistruar mbi 1,500 vrasje në këtë shtet.
Varrezat e fshehta janë një metodë e përdorur shpesh nga organizatat kriminale për të zhdukur gjurmët e viktimave të tyre. Meksika përballet me një krizë të thellë zhdukjesh, me mbi 132,000 persona të raportuar si të zhdukur në gjithë vendin.
