Një përpjekje e rrallë diplomatike për të bindur presidentin venezuelas Nicolás Maduro të largohej vullnetarisht nga pushteti ka përfunduar pas vetëm 15 minutash, pasi kërkesat e tij u vlerësuan si të papranueshme nga administrata e Donald Trump. Sipas The Telegraph, biseda telefonike midis palëve ishte e shkurtër dhe e tensionuar, duke nxjerrë në pah kushtet që Maduro vendosi për dorëheqjen e tij.
Gjatë komunikimit, Maduro parashtroi disa kërkesa konkrete: 200 milionë dollarë para largimit, një amnisti të garantuar për deri në 100 zyrtarë të lartë të regjimit dhe mërgim të sigurt në një vend miqësor brenda hemisferës perëndimore. Pikërisht çështja e vendstrehimit u shndërrua në pikën më të nxehtë të diskutimit. Trump i sugjeroi të shkonte në Rusi ose Kinë, por Maduro refuzoi prerë, duke kërkuar të qëndronte sa më afër Venezuelës.
Dëshmitarë të përfshirë në negociata i kanë cilësuar kërkesat e Maduros si një “çmim shpëtimi” për të siguruar mbrotje të plotë për rrethin e tij të ngushtë, një vijë e kuqe që Washingtoni nuk pranoi ta kalonte. Pikërisht këmbëngulja në këto kushte çoi në prishjen e menjëhershme të bisedimeve.
Pas dështimit të dialogut, Katar u shfaq si një opsion kompromisi për mërgimin e mundshëm të Maduros, falë marrëdhënieve të mira që gëzon si me Shtetet e Bashkuara, ashtu edhe me regjimin venezuelas.
Ngjarja vjen në një moment kur komuniteti ndërkombëtar vijon të ushtrojë presion për një tranzicion politik në Venezuelë. Bisedimet e dështuara tregojnë se, megjithëse Maduro shfaq gatishmëri për të negociuar, ai vendos kushte që Perëndimi i konsideron të parealizueshme.
